الصعوبات التي قابلت وائل نور في مشواره الفني
كتبت /نرمين عرفة
=يعني مثلا في بداية حياتي حصلي موقف مش لطيف مع مخرج كبير بس مش هقول اسمه خالص ، في بداياتي وانا تايه كده في التليفزيون واحد صاحبي قالي "عشان تشتغل لازم تعمل علاقات مع مخرجين التليفزيون" ، قلتله ازاي؟؟" .. قالي "تخش مكاتبهم تسلم عليهم وتقولهم صباح الخير" ، قلتله" بس كده ؟!" ، "قالي اه" .. قلتله اوكيه سهلة ، فبقيت كل يوم اخش اسلم على المخرجين واحد واحد واقولهم "صباح الخير" وامشي ، بقت شغلتي اليومية لمدة 7 شهور انزل من البيت اروح على التليفزيون اسلم ع المخرجين واقولهم "صباح الخير" واروح .. وبعدين مخرج كبير منهم كان داخل يعمل مسلسل فصاحبي ده قالي "روح ادخله البلاتوه وقوله انا وائل نور وعايز اشتغل معاك وقولهاله بجرأة ومتخافش ده بقى عارفك دلوقتي خلاص" ، كلامه حمسني رحت للمخرج ع البلاتوه وعلى حظي كان المخرج متضايق من حاجة معرفش ايه هي ، دخلت قلتله "صباح الخير" ، لقيته زعق فيا وقالي "صباح اييييه ، عايز اييييه !!".. قلتله "انا وائل أاا" وقعدت اتهته من الخضة ، قالي "وائل ايه ؟!!" ، قلتله "انا وائل اللي بقولك صباح الخير كل يوم وعايز اشتغل معاك" .. قالي "تشتغل ايه اطلع برا، برااااااا !!".. لقيت نفسي بتطرد وانا معملتش حاجة خالص ويومها والله بكيت بكاء فظيع اوي ان انا معملتش أي حاجة واتطردت طبعا لما بفتكر الموقف ده دلوقتي بضحك بس خلاص من يومها حرمت اعمل علاقات تاني
