جميل راتب بن الذوات اشتغل جرسون في باريس
كتبت/منال حمزة
-حضرتك لما سافرت فرنسا اشتغلت جرسون واشتغلت شيال .. انت من عائلة أرستقراطية ، غنية ومعاها فلوس تطلع على فرنسا تشتغل الأشغال دي ليه ؟!!
=لان انا كنت رايح فرنسا ادرس قانون وأول ما وصلت سيبت القانون ورحت ادرس تمثيل فبعد وقت معين العائلة منعت عني المصروف ومباقوش يبعتولي فلوس عشان ارجع عن التمثيل يعني هما افتكروا ان ده هيرجعني وهيخليني انسى التمثيل بس انا مرجعتش وكملت فاضطريت اشتغل عشان أعيش فاشتغلت كل حاجة تقريبا ومن الأعمال المهمة جدا اللي اشغتلها هي اني اشتغلت شيال في سوق الخضار في فرنسا لاني اتعرفت على مجموعة من الناس وشريحة من المجتمع مكنتش هعرفها خالص وانا عايش في الطبقة الأرستقراطية اللي نشأت فيها ، مكنتش هعرفهم غير في الفرصة دي وفتحت في دماغي أبواب كبيرة لان كلنا كنا بنشتغل وبنكافح لهدف واحد بس اننا ناكل مش أكتر من كده ، كانوا ناس مقبلين على الحياة وعلى شغلهم وبيهتموا بإتقانه والتفكير فيه رغم انها شغلانة ملهاش أي مستقبل كل اللي تقدر تجيبه منها هو أكل يومك فقط فمكناش بنبص لبكرة كل تفكيرنا في النهاردة بس .. فلقيت نفسي في مستوى غير اللي كنت متوقع ابقى فيه بس ده سمحلي اني انظر للمجتمع بطريقة جديدة واحترم أي حد بيشتغل أي عمل مهما كان بسيط ولغاية دلوقتي بحترم جدا اللي بيشتغلوا في الأعمال البسيطة سواء في فرنسا او في مصر او في أي بلد وبحترم فكرة الشغل نفسها حتى لو من أجل الأكل فقط وحبيت الناس اللي اشتغلت معاهم وبفتخر دايما اني كنت واحد منهم
